Gos’nik Ko Karin?

Gos’nik

Gos’nik as tayari:

Gos’nik ho’n’i cawmos ani s’umber shokhek, jangu’n’, patyak, cew, d’anshak bhut, kupasik zhe sawew karin. 

Gos’nik Ko Karin?

Gosnik shenhen ghon’i karin ki sudayak Kal’a’s’a dastur as mocay atiw. Gos’nik pe ne kai aini haw purus’guak ashigu’yaw zhu geri bashal asta pariw, istrizhaguak as gos’nik pe ne kai aini haw se onjest’a whan’una pariw, kun’d’ok aw uk piw zhe purus’on som asta au zhu. Istrizhaguak asta ek Chat’ kupasik san’ben, purus’guak as o du chat’ gos’nik karin. Ek ta cel’ik san’ben, cel’ik san’bihai o Indreina ne nin. Bhut pe san’behan haw phato se Bashali ne cut’iw, ashiguyaw ne zhu, indreina parik bhan. Istrizhaguak as pe kupasik san’bihan haw onjest’a whan’ay ne pariw, 

Gos’nik kayo karin?

Gos’nik du wew una karin ek ta cawmos una karin, gos’nik dic’ gri o karin. Dic’ khen kay gri? 

Dic’ grikas bati saw san’biuni mud’in, dur s’ons’kin, wazin, zontr sucai s’is’aau gar pis’in. Phato purus’ onjest’a bat zhe is’t’lak oniwo, shul’ayak, onza, l’on’, idon, jan’ zhe at oni gos’t’ dram’i thai o wazaw toa bazi nigik uts una pariw, tara pay onjest’a ugas ta gri ita s’is’a au kariw. S’is’a au karik wew warik moc o to angar ne cut’in. Purus’ saw wazi mod’ll’a new bew san’ben, phato grom sucin, toa ek whan’una pai muti mari istongas kayo, kond’a mes’alak nomai hu s’atan. Hu s’ati pe bic’hron haw nagar ro nomin. Phato ticak wat l’abe’hin.

Gos’nik Au kayo karin?

Istongas kay pe on haw, kas dura pe gos’nik ashis te kura ta duray kai au karin,kura o handay kai au karin.Gos’nik au hawel dai  jamili cariw toa saw gromani moc saw yawan thi au karin au karawan nigilaw [al’uk] pacen, cai karin au pe pura hawan haw tasi yawan hiawan pacawal’i karin toa saraz dyen saraz ne dyai o gos’nik au ashuna ne dian.

Bhut san’biek 

Bhut kura san’biel? Bhut san’bihekas bati moais push asta gri in [bira ,pay,a’me’a,]gos’nik harikanı s’umber tasi moasi au dyen au pe ashan haw , tasi moasi shuman , ja’n’gu’n zhe ga’ai karay o te gos’nik piranik ,mewa,sawel’una kai ruaw thyen toa te moasi kupasik,cel’ik zhe bhut san’bi ai o tasi sudayan majaras bati sual karin.phato tasi moasi ruaw gilet’i zhe mis thyen .toa tasi gos’nik khon’i’an kai san’pa’n’hut karin tasi gromani mocan asta sawel’ai kai mashutyak ,bribo pal’aw zhe t’ong dyen shaman o har duraw istek mocan ga’ai karin gad’a ayasi hatya asta phona karin te gos’nik au o saw gromuna phazhi den.

Kas mocan som pe bribo ne ashini haw te sarazari kai jhonta mari ka’i’ kai gos’nik bas’ dyen moasi hatya o gos’nik una ja’n’u’ karin.

Pushaw istongas 

Pushaw istongas kas karin?

Pushaw istongas bhut zhe cel’ik san’biala suda gos’t’ay ni bira mari s’is’una l’ui bitrisai istongas karin.duray o istrizha bribo bishai ja’n’ kai sat yao no pushal’a auyak karin te au o shatara mi o ne zhun copa o zhun.ponj chat’ o ingrok una saraz dyen.kupasik san’biala istrizha gua’kan o c’anj’a aw uchun’ di o s’is’a au sucen.

Pushaw marat’

Puushaw marat’ Ingal’auna,Mahadel’a zhe gos’t’una bira mari pushaw  marat’ karin.Kas pe gos’nik aran haw te dura Jes’t’ukana ek zhandar mari pushaw marat’ karin.Pushaw marat’ani te mos pacai saw gromuna pacai phazhi dyen.

Indrein grionyak

Ingrein grionyak kia gri  karin?

Indreini grionyak bew tal’i gri karin indreini grionyak una hatya shan’ga’yak asta karin. Shan’ga’yak tsatak bew tal’i gri karin .shan’ga’yak zhe grionyak karik wew chomai o ne histin wanaga apal’an pe haw te gri o ne karin .pura pe hawa haw saraz gri sucai o gos’t’una hai thyen.

C’anj’a

C’anj’a khen kai karin?

C’anj’a chizhin shul’a tal’un’yak bishai o tal’i angara kai tapai o bonin.C’anja durai saw mocan hatya karin istek o bes’ karin, kura istrizha pe os’o

Wal’i ani haw tasi hatya o dugu’ak kai c’anj’a karin.te c’an’j’a s’t’ai prus’t’ indeina hatya parin te bhut san’biala sudayak asta indeina hatya parin.